അലനെ കുത്തിക്കൊന്ന കേസിലെ മുഖ്യപ്രതിയെ തിരിച്ചറിഞ്ഞു;പ്രതി സ്ഥിരം കത്തി കൊണ്ട് നടക്കുന്ന റൗഡി ലിസ്റ്റിലുള്ളയാൾ

തിരുവനന്തപുരം: തൈക്കാട് നടുറോഡില്‍ വെച്ച് 18കാരനെ കുത്തിക്കൊന്ന കേസില്‍ മുഖ്യപ്രതിയെ തിരിച്ചറിഞ്ഞു. ജഗതി സ്വദേശി അജിന്‍ (ജോബി) ആണ് അലന്‍ വധത്തിലെ മുഖ്യപ്രതി. വധശ്രമം ഉള്‍പ്പെടെയുള്ള കേസുകളില്‍ ഇയാള്‍ പ്രതിയാണ്. മ്യൂസിയം പൊലീസ് സ്റ്റേഷനിലെ റൗഡി ലിസ്റ്റിലുള്ള ആള് കൂടിയാണ് അജിന്‍.

അജിന് പുറമേ ജഗതി സ്വദേശികളായ നന്ദു, അഭിജിത് എന്നിവരടക്കം നാല് പേരാണ് കേസില്‍ ഇനി പിടിയിലാകാനുള്ളത്. നിലവില്‍ അറസ്റ്റിലായ കാപ്പാ കേസ് പ്രതി സന്ദീപ് (27), അഖിലേഷ് (20) എന്നിവരെ റിമാന്‍ഡ് ചെയ്തിട്ടുണ്ട്. നേരത്തെ അലനെ ആക്രമിച്ചത് കമ്പികൊണ്ടുള്ള ആയുധം കൊണ്ടാണെന്നായിരുന്നു കരുതിയിരുന്നത്. എന്നാല്‍ കത്തി കൊണ്ടാണ് കുത്തിയതെന്നായിരുന്നു അലന്റെ സുഹൃത്തുക്കള്‍ പൊലീസിന് നല്‍കിയ മൊഴി. അജിന്‍ കത്തി കൊണ്ടു നടക്കുന്നയാളാണെന്നാണ് പൊലീസ് പറയുന്നത്.