ഈ ലോകം പെണ്കുട്ടികളുടേതും; ഈ സര്ക്കാര് പെണ്ണുങ്ങള് അടക്കം എല്ലാവരുടേയും: വി ശിവന്കുട്ടി
കണ്ണൂര്: ചിത്രം വരച്ച് നല്കിയതിൽ അഭിനന്ദിച്ചതോടെ വികാരാധീനയായ പെണ്കുട്ടിയെ ചേര്ത്തുപിടിച്ച് വിദ്യാഭ്യാസ മന്ത്രി വി ശിവന്കുട്ടി. നിഹാര എന്ന സ്കൂള് വിദ്യാര്ത്ഥിയെയാണ് മന്ത്രി ചേര്ത്ത് നിര്ത്തിയത്. ശിവന്കുട്ടിയുടെ ചിത്രം വരച്ചുവന്ന കുട്ടി ഈ ചിത്രം മന്ത്രിക്ക് നല്കുകയും മന്ത്രി അത് സ്നേഹത്തോടെ സ്വീകരിക്കുകയും ചെയ്തു. പിന്നാലെ കരഞ്ഞ കുട്ടിയെ ശിവന്കുട്ടി സമാധാനിപ്പിക്കുകയായിരുന്നു. ശിവന്കുട്ടി നിഹാരക്കൊപ്പമുള്ള ചിത്രം ഫേസ്ബുക്കില് പങ്കുവെച്ചിട്ടുണ്ട്.
കണ്ണൂര് ചെറുതാഴം സര്ക്കാര് ഹയര് സെക്കന്ഡറി സ്കൂളിലെ വികസന പദ്ധതികള് ഉദ്ഘാടനം ചെയ്യാനായിരുന്നു മന്ത്രിയെത്തിയത്. ആ സമയം വരച്ച ചിത്രവുമായി നിഹാരമന്ത്രിക്ക് സമീപമെത്തുകയായിരുന്നു. നിഹാര വരച്ച ചിത്രവും മന്ത്രി ഫേസ്ബുക്ക് പോസ്റ്റില് പങ്കുവെച്ചിട്ടുണ്ട്. പെണ്ണുങ്ങള് കിരീടവുമേന്തി ലോകത്തിന്റെ നെറുകയില് നില്ക്കുമ്പോള് നിഹാര മോള് എന്തിന് കരയണമെന്ന കുറിപ്പോടെയാണ് മന്ത്രി ചിത്രം പങ്കുവെച്ചിരിക്കുന്നത്.
