ഇന്ത്യയിൽ SJ-100 വിമാനം നിര്മിക്കും; റഷ്യൻ കമ്പനിയുമായി ഹിന്ദുസ്ഥാൻ എയ്റോനോട്ടിക്സ് ചരിത്രപരമായ കരാറിൽ ഒപ്പുവച്ചു
റഷ്യയിലെ വിമാന നിർമാണ കമ്പനിയായ PJSC-UAC യുമായി ചേർന്ന് ഇന്ത്യയിൽ എസ് ജെ- 100 യാത്രാവിമാനം നിർമിക്കുന്നതിനായി ഹിന്ദുസ്ഥാൻ എയ്റോനോട്ടിക്സ് ലിമിറ്റഡ് (HAL)ധാരണാപത്രം ഒപ്പുവച്ചു. ഇന്ത്യയുടെ എയറോസ്പേസ് നിർമ്മാണ ശേഷിക്ക് കരുത്തേകുന്ന സുപ്രധാന ചുവടുവെയ്പ്പുമാണിത്. 1988-ൽ AVRO HS-748 ന്റെ നിർമ്മാണം അവസാനിച്ചതിന് ശേഷം ഇന്ത്യയിൽ നിർമ്മിക്കുന്ന ആദ്യത്തെ സമ്പൂർണ്ണ യാത്രാവിമാനമാണിത് എന്ന പ്രത്യേകതയും ഈ ചരിത്രപരമായ കരാറിനുണ്ട്.
പ്രാദേശിക കണക്റ്റിവിറ്റിക്കായി രൂപകൽപ്പന ചെയ്ത ഇരട്ട എഞ്ചിൻ, നാരോ-ബോഡി വിമാനമാണിത്. ഇത് ഇന്ത്യയുടെ ഉഡാൻ പദ്ധതിക്ക് വലിയ ഉത്തേജനം നൽകുമെന്നാണ് പ്രതീക്ഷിക്കപ്പെടുന്നത്.
അടുത്ത 10 വർഷത്തിനുള്ളിൽ ഇന്ത്യൻ പ്രാദേശിക കണക്റ്റിവിറ്റിയിൽ 200ൽ അധികം ജെറ്റുകൾക്കും ഇന്ത്യൻ മഹാസമുദ്ര മേഖലയിൽ 350 വിമാനങ്ങൾക്കും ആവശ്യമുണ്ടാകുമെന്നാണ് കണക്കാക്കുന്നത്. ആഭ്യന്തര ഉപഭോക്താക്കൾക്കായി വിമാനം നിർമിക്കാനുള്ള അവകാശം ഈ കരാർ എച്ച്എഎല്ലിന് നൽകുന്നു. ഇത് ഇന്ത്യയുടെ എയറോസ്പേസ് വ്യവസായത്തെ ശക്തിപ്പെടുത്താനും ‘ആത്മനിർഭർ ഭാരത്’ സംരംഭത്തിന് സംഭാവന നൽകാനും സഹായിക്കും.
