മലപ്പുറം: പിഎം ശ്രീ പദ്ധതിയുമായി ബന്ധപ്പെട്ട വിവാദത്തില് പ്രതികരിച്ച് മുന് എംഎല്എയും ടിഎംസി നേതാവുമായ പി വി അന്വര്. മുഖ്യമന്ത്രി പിണറായി വിജയന്റെ നിര്ബന്ധത്തിലാണ് പിഎം ശ്രീയില് ഒപ്പിട്ടതെന്ന് എംഎല്എ പറഞ്ഞത്. ദേശീയ വിദ്യാഭ്യാസ നയത്തിന് (എന്ഇപി) എന്താണ് കുഴപ്പം എന്നാണ് വിദ്യാഭ്യാസ മന്ത്രി വി ശിവന്കുട്ടി ചോദിക്കുന്നതെന്നും കുഴപ്പം ഉണ്ട് എന്ന് പറഞ്ഞത് ഇവര് തന്നെയല്ലേയെന്നും അദ്ദേഹം ചോദിച്ചു.
‘മുമ്പ് ഞങ്ങള് പറഞ്ഞ ഓരോ കാര്യങ്ങളും ഇപ്പോള് ശരിയായി മാറി. ബഡ്ജറ്റിന്റെ ഒരു ശതമാനം പോലും വരാത്ത പണം നേടാനാണോ ഒപ്പിട്ടത്. മതേതരത്വത്തെ പിണറായി സര്ക്കാര് തൂക്കി വിറ്റു. പിണറായിയുടെ വ്യക്തപരമായ ആവശ്യത്തിനാണിത്’, പി വി അന്വര് പറഞ്ഞത്. കേന്ദ്ര ആഭ്യന്തരമന്ത്രി അമിത് ഷായുടെ സത്കാരം സ്വീകരിക്കാനാണ് പിണറായി വസതിയില് പോയതെന്നും അദ്ദേഹം ആരോപിച്ചു. ബിജെപി പിണറായി ബന്ധം അടിവരയിടുന്നതാണ് പിഎം ശ്രീയിലിട്ട ഒപ്പെന്നും പി വി അന്വര് പറഞ്ഞു.
