ക്രിസ്മസ് സീസൺ ട്രെയിൻ ടിക്കറ്റ് ബുക്കിങ് ആരംഭിച്ചു; മണിക്കൂറുകൾക്കുള്ളിൽ ബെംഗളൂരു – കേരള ടിക്കറ്റുകൾ തീർന്നു, ഇനിയും വൈകേണ്ട

കൊച്ചി: അവധിക്കാലത്ത് ട്രെയിൻ ടിക്കറ്റ് കിട്ടാതെ വലയുന്ന യാത്രക്കാരെ നാം പതിവായി കാണുന്നതാണ്. അയൽ സംസ്ഥാനങ്ങളിൽ നിന്ന് കേരളത്തിലേക്ക് വരുന്നവരായാലും, സംസ്ഥാനത്തിനകത്ത് യാത്ര ചെയ്യുന്നവരായാലും അവസാനസമയത്ത് സ്പെഷ്യൽ ട്രെയിൻ പ്രഖ്യാപിക്കുമോ എന്നറിയാനാകും കാത്തിരിക്കുക. ഓണത്തിനും, വിഷവിനും, ദീപാവലിയ്ക്കും നമ്മളിത് കണ്ടതുമാണ്. ഇത്തരക്കാർക്കിതാ ക്രിസ്മസ് അവധിയ്ക്ക് ട്രെയിൻ ടിക്കറ്റ് ഉറപ്പിക്കാനുള്ള അവസരം എത്തിയിരിക്കുകയാണ്. ഇന്ത്യൻ റെയിൽവേയുടെ ടിക്കറ്റ് ബുക്കിങ് നിയമം അനുസരിച്ച് ക്രിസ്മസ് സീസൺ ബുക്കിങ് ആരംഭിച്ചിരിക്കുകയാണ്.ഡിസംബർ 22 തിങ്കളാഴ്ചത്തെ ട്രെയിൻ ടിക്കറ്റാണ്, ഇന്ന് (23 ഒക്ടോബർ) ബുക്ക് ചെയ്യാൻ കഴിയുക. നാളെ ഡിസംബർ 23ൻ്റെയും മറ്റന്നാൾ ഡിസംബർ 24ൻ്റെയും ടിക്കറ്റുകളും ബുക്ക് ചെയ്യാം. നിലവിലെ നിയമം അനുസരിച്ച് യാത്രാ തീയതിയുടെ 60 ദിവസം മുന്നേയാണ് ടിക്കറ്റ് ബുക്കിങ് ആരംഭിക്കുക.

ക്രിസ്മസ് – പുതുവത്സര അവധിയ്ക്ക് നാട്ടിലെത്താൻ ആഗ്രഹിക്കുന്നവർക്ക് അതിവേഗത്തിൽ ടിക്കറ്റുകൾ ബുക്ക് ചെയ്യാൻ ഇതുവഴി കഴിയും.ക്രിസ്മസ് സീസൺ ബുക്കിങ് ആരംഭിച്ച് നിമിഷങ്ങൾക്കുള്ളിൽ തന്നെ ബെംഗളൂരുവിൽ നിന്ന് കേരളത്തിലേക്കുള്ള ടിക്കറ്റുകൾ അതിവേഗത്തിലാണ് ബുക്ക് ചെയ്ത് പോകുന്നത്. ബെംഗളൂരുവിൽ നിന്ന് എറണാകുളത്തേക്ക് വൈകീട്ട് ഏഴ് മണിയ്ക്ക് പുറപ്പെടുന്ന സൂപ്പർ ഫാസ്റ്റ് എക്സ്പ്രസിൽ 2എ ക്ലാസ് ടിക്കറ്റുകൾ ഇപ്പോൾ തന്നെ വെയ്റ്റിങ് ലിസ്റ്റായി 3 എ കോച്ചിലും അതിവേഗമാണ് ബുക്കിങ് നടക്കുന്നത്. അതേസമയം സ്ലീപ്പർ ക്ലാസ് ടിക്കറ്റുകൾ ബാക്കിയുണ്ട്.

അതേസമയം 16526 ബെംഗളൂരു – കന്യാകുമാരി എക്സ്പ്രസിൽ ഡിസംബർ 22ൻ്റെ ടിക്കറ്റുഖൾ സ്ലീപ്പർ കോച്ച് ഉൾപ്പെടെ എല്ലാം വെയ്റ്റിങ് ലിസ്റ്റ് സ്റ്റാറ്റസിലേക്ക് എത്തിയിട്ടുണ്ട്. കൺഫേം ടിക്കറ്റുകൾ പൂർണ്ണമായും ബുക്കിങ്ങായി. 16331 ട്രിവാൻഡ്രം എക്സ്പ്രസിൽ ഡിസംബർ 22ന് സ്ലീപ്പർ ക്സാസിൽ നിലവിൽ വെയ്റ്റിങ് ലിസ്റ്റ് 4 ആണ് ടിക്കറ്റ് നില, 3 എ, 2 എ എന്നിവയും ഇതേ നിലയിലാണുള്ളത്. 3 ഇ ക്ലാസിൽ നാല് ടിക്കറ്റുകളാണ് ബാക്കിയുള്ളത്.