നൊബേൽ വാരം ആരംഭിച്ചു; ഏറ്റവും കൂടുതൽ പുരസ്കാരം നേടിയ രാജ്യമേത്? ഇന്ത്യയുടെ സ്ഥാനം എത്രാമത്?
സ്വീഡൻ: വൈദ്യശാസ്ത്ര നൊബേൽ പ്രഖ്യാപനത്തിന് പിന്നാലെ, നൊബേൽ വാരം ഔദ്യോഗികമായി ആരംഭിച്ചിരിക്കുകയാണ്. ലോകമെമ്പാടുമുള്ള പ്രഗത്ഭരെ അവരുടെ മേഖലകളിലെ മികച്ച നേട്ടങ്ങൾക്ക് അംഗീകരിക്കുകയും ആദരിക്കുകയും ചെയ്യുന്ന സമയമാണിത്. മനുഷ്യരാശിക്ക് ഏറ്റവും വലിയ നേട്ടം സ്വന്തമാക്കികൊടുത്തവർക്കുള്ള പുരസ്കാരം എന്നാണ് നൊബേലിന്റെ വിൽപത്രത്തിൽ കുറിച്ചിരിക്കുന്നത്.
ഡൈനാമൈറ്റിന്റെ ഉപജ്ഞാതാവായ ആൽഫ്രഡ് നൊബേലാണ് നൊബേൽ പുരസ്കാര പാരമ്പര്യം തുടങ്ങുന്നത്. 1901ൽ ഹെൻറി ഡുനന്റും ഫ്രെഡറിക് പാസിയും സമാധാനത്തിനുള്ള ആദ്യ നൊബേൽ സമ്മാനം നേടി ഈ പാരമ്പര്യത്തിന് തുടക്കം കുറിച്ചു. ഏത് രാജ്യമാണ് ഏറ്റവുമധികം നൊബേൽ പുരസ്കാരം നേടിയതെന്ന് പരിശോധിക്കാം.
ഏറ്റവും കൂടുതൽ നൊബേൽ സമ്മാനം നേടിയ രാജ്യങ്ങളുടെ പട്ടികയിൽ 423 അവാർഡുകളോടെ യുഎസാണ് ഒന്നാം സ്ഥാനത്ത് നിൽക്കുന്നത്. ഈ പട്ടികയിൽ നാല് പ്രസിഡന്റുമാർ, ഒരു വൈസ് പ്രസിഡന്റ്, സ്റ്റേറ്റ് സെക്രട്ടറി എന്നിവർ ഉൾപ്പെടുന്നു.143 നോബൽ സമ്മാന ജേതാക്കളുമായി യുകെ യുഎസിന് തൊട്ടുപിന്നിലുണ്ട്. പെൻസിലിൻ കണ്ടുപിടിച്ച അലക്സാണ്ടർ ഫ്ലെമിംഗ് മുതൽ ജംഗിൾ ബുക്ക് എഴുതിയ റുഡ്യാർഡ് കിപ്ലിംഗ് വരെ യുകെയുടെ സ്വീകർത്താക്കളിൽ ഉൾപ്പെടുന്നു.
ഭൗതികശാസ്ത്രം, രസതന്ത്രം, സമാധാനം, സാഹിത്യം തുടങ്ങിയ മേഖലകളിലായി 115 നോബൽ സമ്മാന ജേതാക്കളുടെ നാടാണ് ജർമനി. 76 നോബൽ സമ്മാന ജേതാക്കളുമായി ഫ്രാൻസ് പട്ടികയിൽ നാലാം സ്ഥാനത്താണ്.ഫ്രാൻസിന്റെ പിന്നിൽ 34 അവാർഡുകളുമായി നൊബേൽ സമ്മാനത്തിന്റെ ജന്മസ്ഥലമായ സ്വീഡനാണ് നിലകൊള്ളുന്നത്.
