‘ഒരു ആശുപത്രി പോലും ഞങ്ങളെ ഏറ്റെടുത്തില്ല’: 5 ലക്ഷം രൂപയുടെ സൗജന്യ ചികിത്സ വാഗ്ദാനം ചെയ്യുന്ന ആയുഷ്മാൻ ഭാരത് പദ്ധതിക്കെതിരെ യുവതി
മുംബൈ: കേന്ദ്ര സർക്കാരിൻ്റെ അഭിമാനകരമായ ആരോഗ്യ ഇൻഷുറൻസ് പദ്ധതിയായ ആയുഷ്മാൻ ഭാരത് – പ്രധാൻ മന്ത്രി ജൻ ആരോഗ്യ യോജന (പിഎം-ജെഎവൈ)യെ പരസ്യമായി വിമർശിച്ച് മുംബൈയിൽ നിന്നുള്ള യുവതി. തന്റെ പിതാവിനെ ആശുപത്രിയിൽ പ്രവേശിപ്പിക്കാൻ ശ്രമിച്ചപ്പോൾ ഉണ്ടായ വേദനാജനകമായ അനുഭവം പങ്കുവെച്ചാണ് യുവതിയുടെ വിമർശനം. ഈ പദ്ധതി വ്യാജമാണെന്നും അവർ പറഞ്ഞു. വീഡിയോ സോഷ്യൽ മീഡിയയിൽ വൈറലാണ്.67 വയസ്സുള്ള അവരുടെ പിതാവിൻ്റെ ചികിത്സയുമായി ബന്ധപ്പെട്ട് പദ്ധതിയുടെ ആനുകൂല്യം തേടി 24 ആശുപത്രികളിലേക്ക് വിളിച്ചെങ്കിലും പദ്ധതിയുടെ ഗുണം അവർക്ക് ലഭിച്ചില്ല. നാല് പതിറ്റാണ്ടുകളായി ബാങ്കിൽ സേവനമനുഷ്ഠിക്കുകയും കൃത്യമായി നികുതി അടയ്ക്കുകയും ചെയ്തിരുന്ന, മുൻ എസ്ബിഐഉദ്യോഗസ്ഥനായ അവരുടെ പിതാവിന് പുലർച്ചെ 5:30 ഓടെ ഗുരുതരമായ മെഡിക്കൽ എമർജൻസി അനുഭവപ്പെട്ടു. ആയുഷ്മാൻ ഭാരതിന് കീഴിൽ 5 ലക്ഷം രൂപയുടെ ആരോഗ്യ പരിരക്ഷ ലഭിക്കുമെന്ന പ്രതീക്ഷയിൽ, മുംബൈ, താനെ, നവി മുംബൈ എന്നിവിടങ്ങളിലെ പദ്ധതിയിൽ ലിസ്റ്റുചെയ്തിരിക്കുന്ന ആശുപത്രികളിലേക്ക് അവർ വിളിച്ചെങ്കിലും നിരാശയായിരുന്നു ഫലം.
“ആകെ 24 ആശുപത്രികളിലേക്ക് ഞാൻ വിളിച്ചു. ആയുഷ്മാൻ ഭാരതുമായി ബന്ധമില്ലെന്ന് പത്ത് ആശുപത്രികൾ അറിയിച്ചു. ഏകദേശം ആറ് ആശുപത്രികൾ പൂർണ്ണമായും ബന്ധപ്പെടാൻ കഴിഞ്ഞില്ല, ബാക്കിയുള്ളവ പരിഹാസ്യമായ നിബന്ധനകൾ ഏർപ്പെടുത്തി. ഒരാൾ ഈ പദ്ധതി ഓങ്കോളജിക്ക് മാത്രമേ ബാധകമാകൂ എന്നും മറ്റൊരാൾ ഇത് ഐസിയു പരിചരണത്തിന് മാത്രമേ സാധ്യതയുള്ളൂ എന്നും പറഞ്ഞു.
“വിദ്യാഭ്യാസമുള്ള, ഇന്റർനെറ്റ് സാക്ഷരതയുള്ള, കണക്റ്റിവിറ്റിയുള്ള ഞങ്ങളുടേതുപോലുള്ള ഒരു കുടുംബത്തിന് ഒരു പ്രതിസന്ധിയിൽ സഹായ ലഭിക്കുന്നില്ലെങ്കിൽ, ദിവസ വേതനക്കാരും ദരിദ്ര കുടുംബങ്ങളും ഈ സംവിധാനത്തെ എങ്ങനെ മറികടക്കും?” താരതമ്യേന നല്ല വിദ്യാഭ്യാസം ലഭിക്കുകയും നഗരപ്രദേശത്ത് ജീവിക്കുകയും ചെയ്യുന്ന യുവതിയുടെ ചോദ്യങ്ങൾ വൈറലാണ്.
