പൊലീസിന്റെ സാന്നിധ്യത്തിൽ മദ്യം കഴിച്ച് ടി പി കേസ് കുറ്റവാളികള്; മൂന്ന് പൊലീസ് ഉദ്യോഗസ്ഥര്ക്ക് സസ്പെന്ഷൻ
കണ്ണൂര്: പൊലീസിന്റെ സാന്നിധ്യത്തില് ടി പി ചന്ദ്രശേഖരന് വധക്കേസ് പ്രതികള് മദ്യം കഴിച്ചെന്ന കണ്ടെത്തലില് പൊലീസ് ഉദ്യോഗസ്ഥര്ക്ക് സസ്പെന്ഷന്. ജില്ലാ പൊലീസ് ആസ്ഥാനത്തെ മൂന്ന് പൊലീസ് ഉദ്യോഗസ്ഥര്ക്കാണ് സസ്പെന്ഷന്. അന്വേഷണത്തില് ഉദ്യോഗസ്ഥര്ക്ക് വീഴ്ച സംഭവിച്ചതായി വ്യക്തമായിരുന്നു. ഇതിന്റെ അടിസ്ഥാനത്തിലാണ് നടപടി.
ഇക്കഴിഞ്ഞ ജൂണ് പതിനേഴാം തീയതിയായിരുന്നു സംഭവം. ടി പി കേസ് പ്രതികളായ കൊടി സുനി, മുഹമ്മദ് ഷാഫി, ഷിനോജ് എന്നീ പ്രതികള് പൊലീസ് സാന്നിധ്യത്തില് മദ്യപിച്ചു എന്നായിരുന്നു ആരോപണം. കണ്ണൂര് സെന്ട്രല് ജയിലില് നിന്ന് തലശ്ശേരി അഡീഷണല് ജില്ലാ കോടതി മൂന്നില് പ്രതികളെ ഹാജരാക്കാന് കൊണ്ടുപോയപ്പോഴായിരുന്നു സംഭവം.
കോടതിയില് ഹാജരാക്കിയ ശേഷം ഉച്ചയ്ക്ക് ഭക്ഷണം കഴിക്കുന്നതായി കോടതി പിരിഞ്ഞിരുന്നു. ഈ സമയം ഭക്ഷണം വാങ്ങി നല്കുന്നതിനായി പ്രതികളെ പൊലീസ് സമീപത്തെ വിക്ടോറിയ ഹോട്ടലില് എത്തിച്ചു. ഈ സമയം പ്രതികളുടെ സുഹൃത്തുക്കള് ഇവിടേയ്ക്ക് എത്തുകയും പൊലീസിന്റെ സാന്നിധ്യത്തില് പ്രതികള് മദ്യം കഴിച്ചു എന്നുമായിരുന്നു പരാതി. ഇതിന് പിന്നാലെ സംഭവത്തില് അന്വേഷണം പ്രഖ്യാപിക്കുകയും പൊലീസിന് വീഴ്ച സംഭവിച്ചതായി വ്യക്തമാകുകയും ചെയ്തിരുന്നു. ഇതിന് പിന്നാലെയാണ് മൂന്ന് പൊലീസ് ഉദ്യോഗസ്ഥരെ സസ്പെന്ഡ് ചെയ്തത്.
