മധ്യസ്ഥത എന്ന പേരിൽ സാമുവൽ ജെറോം പണം കവർന്നു, ചതി നിർത്തിയില്ലെങ്കിൽ സത്യം തെളിയിക്കും, തലാലിന്റെ സഹോദരൻ
സനാ: നിമിഷപ്രിയയുടെ മോചനത്തില് അനിശ്ചിതത്വം തുടരുന്നതിനിടെ സാമുവല് ജെറോമിനെതിരെ ഗുരുതര ആരോപണങ്ങള് ഉന്നയിച്ച് യെമനില് കൊല്ലപ്പെട്ട തലാലിന്റെ സഹോദരന് അബ്ദുൽ ഫത്താഹ് മഹ്ദി. സാമുവല് ജെറോം മധ്യസ്ഥത എന്ന പേരില് പണം കവര്ന്നെന്നും നിമിഷപ്രിയയുടെ മോചന വിഷയത്തില് സാമുവല് ജെറോം തങ്ങളുമായി ബന്ധപ്പെട്ടിട്ടില്ലെന്നും അബ്ദുൽ ഫത്താഹ് മഹ്ദി ഫേസ്ബുക്ക് കുറിപ്പില് വ്യക്തമാക്കി. അറബിയിലുള്ള കുറിപ്പ് മലയാളത്തിലും ഇംഗ്ലീഷിനും തര്ജ്ജമ ചെയ്താണ് ഫേസ്ബുക്കില് പങ്കുവെച്ചിരിക്കുന്നത്.
സാമുവല് ജെറോം തങ്ങളുമായി കൂടിക്കാഴ്ച നടത്തുകയോ കാണുകയോ ബന്ധപ്പെടുകയോ ഒരു മെസേജ് പോലും അയയ്ക്കുകയോ ചെയ്തിട്ടില്ലെന്നും, മറിച്ചാണെങ്കില് അത് തെളിയിക്കാന് വെല്ലുവിളിക്കുന്നതായും അദ്ദേഹം ഫേസ്ബുക്കില് കുറിച്ചു. വധശിക്ഷക്ക് പ്രസിഡന്റ് അംഗീകാരം നല്കിയതിന് പിന്നാലെ താന് അദ്ദേഹത്തെ സനായില് വെച്ച് കണ്ടുമുട്ടിയെന്നും അന്ന് സന്തോഷത്തോടെ സാമുവല് ജെറോം ഒരായിരം അഭിനന്ദനങ്ങള് എന്ന് പറഞ്ഞതായും ഫേസ്ബുക്ക് കുറിപ്പില് വ്യക്തമാക്കുന്നു. പിന്നീട് മണിക്കൂറുകള്ക്ക് ശേഷം കേരള മാധ്യമങ്ങള് പരിശോധിച്ചപ്പോഴാണ് മോചനത്തിനുള്ള പണമായി സാവുമല് ജെറോം 20,000 ഡോളര് പണം ശേഖരിക്കാന് അഭ്യര്ത്ഥിച്ച വിവരം അറിഞ്ഞതെന്നും വര്ഷങ്ങളായി ഇയാള് തങ്ങളുടെ ചീന്തിയ രക്തം മധ്യസ്ഥത എന്ന പേരില് വ്യാപാരം നടത്തുകയാണെന്നും അബ്ദുൽ ഫത്താഹ് മഹ്ദി ഫേസ്ബുക്കില് കുറിച്ചു. തങ്ങള്ക്ക് സത്യം അറിയാമെന്നും അദ്ദേഹം നുണ പറയുന്നതും ചതിയും അവസാനിപ്പിച്ചില്ലെങ്കില് സത്യം വെളിപ്പെടുത്തുമെന്നും പറഞ്ഞാണ് കുറിപ്പ് അവസാനിപ്പിക്കുന്നത്.
