‘അറസ്റ്റില്ല, മോഹൻലാലിനെ ഓഫീസിലേക്ക് വിളിപ്പിച്ചില്ല’; വേടനെ കുടുക്കാന് തിടുക്കം, ആനക്കൊമ്പ് കേസിൽ ഇഴച്ചിൽ
കൊച്ചി: പുലിപ്പല്ലുമായി റാപ്പര് വേടന് അറസ്റ്റിലായതിനു പിന്നാലെ സൂപ്പര്താരം മോഹന്ലാല് പ്രതിയായ ആനക്കൊമ്പു കേസും വീണ്ടും ചര്ച്ചയിലേക്കെത്തുകയാണ്. വേടനെ കുടുക്കാന് തിടുക്കം കാട്ടിയ വനം വകുപ്പ് ലാലിന്റെ കേസില് മെല്ലെപ്പോക്ക് തുടരുകയാണെന്നാണ് നവമാധ്യമങ്ങളില് ഒരു വിഭാഗം ഉയര്ത്തുന്ന വിമര്ശനം. 2011 ആഗസ്റ്റില് എറണാകുളം തേവരയിലെ മോഹന്ലാലിന്റെ വീട്ടില് റെയ്ഡിനെത്തിയ ആദായ നികുതി വകുപ്പ് സംഘമാണ് വീട്ടില് നിന്ന് നാല് ആനക്കൊമ്പുകള് കണ്ടെത്തിയത്. അന്നു തന്നെ വനം വകുപ്പിന് വിവരം കൈമാറി.
ആനക്കൊമ്പു സൂക്ഷിക്കാനുളള നിയമപരമായ രേഖകളൊന്നും പക്കലില്ലാതിരുന്നിട്ടു കൂടി തിടുക്കത്തില് ലാലിനെതിരെ കേസെടുക്കാനോ അറസ്റ്റ് ചെയ്യാനോ വനം വകുപ്പ് മെനക്കെട്ടില്ല. മറിച്ച് വലിയ കൂടിയാലോചനകള്ക്കു ശേഷമായിരുന്നു അനധികൃതമായി ആനക്കൊമ്പ് സൂക്ഷിച്ച കേസില് ലാലിനെ ഒന്നാം പ്രതിയാക്കി വനം വകുപ്പ് കേസെടുത്തത്. അതും 2012 ജൂണ് മാസത്തില്. വീട്ടിലെ മേശയില് ഉറപ്പിച്ച നിലയില് കണ്ടെത്തിയ തൊണ്ടിമുതലായ ആനക്കൊമ്പുകള് വനം വകുപ്പ് കസ്റ്റഡിയില് എടുത്തിരുന്നുമില്ല.
