കുളിപ്പിച്ച് കൊണ്ടുവരവെ ഓടി, നേരെ വീണത് ഉപയോഗിക്കാത്ത കിണറ്റിൽ; ജെസിബി എത്തിച്ച് പശുവിനെ പുറത്തെടുത്തു

തൃശൂർ: അന്തിക്കാട് കുളിപ്പിച്ച് തിരിച്ചുകൊണ്ടുവരെ വിരണ്ടോടി കിണറ്റിൽ വീണ പശുവിനെ ഫയർഫോഴ്സ് എത്തി കരയ്ക്കെത്തിച്ചു. മണ്ണുമാന്തി യന്ത്രം ഉപയോ​ഗിട്ടാണ് പുറത്തെത്തിച്ചത്. ഫയർ ഫോഴ്സിൻ്റെ വാട്ടർ ഹോസ്, ജെസിബിയിൽ കെട്ടിയാണ് കിണറ്റിലെ വെള്ളത്തിൽ വീണു കിടന്ന പശുവിനെ കരക്കെത്തിച്ചത്.

ഇന്ന് രാവിലെ 11 മണിയോടെ അന്തിക്കാട് വന്നേരിമുക്കിലാണ് സംഭവം. പ്രദേശവാസിയായ വിൻസെൻ്റിൻ്റെ പശുവാണ് കിണറ്റിൽ വീണത്. കുളിപ്പിക്കാൻ കൊണ്ടു പോയ ശേഷം തിരിച്ചു വരുമ്പോൾ ഓടിയ പശു സമീപത്തെ പുല്ല് മൂടി കിടന്ന കൈവരിയില്ലാത്ത കിണറ്റിലേക്ക് വീഴുകയായിരുന്നു. വായ് വട്ടം കുറഞ്ഞ കിണറായതിനാൽ പശുവിനെ പുറത്തെടുക്കുന്നത് ദുഷ്കരമായിരുന്നു. തുടർന്ന് നാട്ടികയിൽ നിന്നെത്തിയ ഫയർ ഫോഴ്സ് സംഘം ജെസിബി ഉപയോഗിച്ച് തങ്ങളുടെ വാട്ടർ ഹോസ് ബന്ധിപ്പിച്ച് 2 ഉദ്യോഗസ്ഥർ കിണറ്റിൽ ഇറങ്ങിയാണ് പശുവിനെ കരക്കെത്തിച്ചത്. പശുവിന് പരിക്കുകൾ ഇല്ലെന്ന് ഉടമ പറഞ്ഞു.