ചെന്നൈ: 2025 റിപ്പബ്ലിക് ദിനത്തോടനുബന്ധിച്ച് പ്രഖ്യാപിച്ച പത്മ പുരസ്കാരങ്ങളില്‍ തമിഴ് സൂപ്പര്‍താരം അജിത് കുമാറിന് പത്മഭൂഷൺ പുരസ്കാരമാണ് ലഭിച്ചത്. തനിക്ക് അവാര്‍ഡ് ലഭിച്ചതില്‍ നന്ദി അറിയിച്ച് അജിത്ത് കുമാര്‍ വൈകാരികമായ കുറിപ്പിലൂടെ നന്ദി അറിയിച്ചിരുന്നു.
പിന്നാലെ തമിഴ്നാട്ടിലെ പ്രമുഖ സിനിമ താരങ്ങളും മറ്റും അജിത്തിനെ അഭിനന്ദിച്ച് രംഗത്ത് എത്തിയിരുന്നു. ഇതില്‍ തമിഴ്നാട്ടിലെ ഭരണകക്ഷി ഡിഎംകെയും, പ്രതിപക്ഷ കക്ഷി എഡിഎംകെയും, ബി.ജെ.പിയും എല്ലാം ഉള്‍പ്പെടും. ഒപ്പം തന്നെ പ്രമുഖ താരങ്ങളും അജിത്തിനെ ഈ അവാര്‍ഡ് നേട്ടത്തില്‍ ആശംസിച്ചിരുന്നു.
എന്നാല്‍ രാഷ്ട്രീയ പാര്‍ട്ടി നേതാവും മുന്‍നിര താരവുമായ വിജയ് അജിത്തിനെ അഭിനന്ദിക്കാത്തത് എന്തായാലും ഫാന്‍സിനിടയില്‍ മുറുമുറുപ്പ് ഉണ്ടാക്കുന്നുവെന്നാണ് വിവരം. എന്നാല്‍ സര്‍ക്കാര്‍ നല്‍കുന്ന ബഹുമതികളുടെ പേരില്‍ ആരെയും അഭിനന്ദിക്കുന്നത് വിജയ്‍യുടെ രീതിയല്ലെന്നാണ് അദ്ദേഹവുമായി അടുത്ത വൃത്തങ്ങള്‍ പറയുന്നത്.
എന്നാല്‍ വിജയ് അജിത്തിന്‍റെ അടുത്തിടെ ഉണ്ടായ ദുബായ് കാര്‍ റേസ് വിജയത്തെയും ആശംസിച്ചില്ലെന്നാണ് ഫാന്‍സ് പറയുന്നത്. എന്നാല്‍ വിജയ് അതില്‍ വ്യക്തിപരമായി അഭിനന്ദനം അറിയിച്ചുവെന്നാണ് മറ്റൊരു റിപ്പോര്‍ട്ട്. എന്നാല്‍ ഇത് സ്ഥിരീകരിക്കപ്പെട്ടിട്ടില്ല. വീണ്ടും ഒരു അജിത്ത് വിജയ് സൈബര്‍ പോരിന് പുതിയ പത്മ പുരസ്കാര വാര്‍ത്ത വഴിവച്ചുവെന്നാണ് ചില തമിഴ് ഗോസിപ്പ് കോളങ്ങള്‍ പറയുന്നത്.
അതേ സമയം പത്മ പുരസ്കാരം വ്യക്തിപരമായ എന്റെ മാത്രമല്ലെന്ന് അജിത്ത് പ്രതികരിച്ചു. ഇതിനു പിന്നില്‍ അനേകരുടെ കഠിന പ്രയത്‌നമുണ്ട്. ചലച്ചിത്ര മേഖലയുടെ മുൻഗാമികൾക്കും, എന്റെ സുഹൃത്തുക്കൾക്കും, മറ്റെല്ലാവർക്കും എന്റെ നന്ദി. നിങ്ങളുടെ പ്രോത്സാഹനം, സഹകരണം, പിന്തുണ എന്നിവ എന്റെ യാത്രയിൽ സഹായകമായതോടൊപ്പം, എന്റെ മറ്റ് താൽപര്യങ്ങളിലേക്കും ശ്രദ്ധ കേന്ദ്രീകരിക്കാൻ അവസരം നൽകിയിരിക്കുന്നുവെന്ന് അജിത്ത് ഇറക്കിയ കുറിപ്പില്‍ പറയുന്നു.
